Гадаад харилцааны яамны Төрийн нарийн бичгийн дарга Н.Анхбаяр НҮБ-ын Хөгжлийн Хөтөлбөрийн Суурин төлөөлөгч М.Димовска-тай 9 дүгээр сарын 22-ны өдөр уулзаж, хамтын ажиллагааны асуудлаар санал солилцов.
Төрийн нарийн бичгийн дарга Н.Анхбаяр олон талт хамтын ажиллагааны салбар дундын уялдааг хангахад Гадаад харилцааны яам тэргүүлэх үүрэгтэй оролцдог болохыг дурдаж, НҮБ-ын Хөгжлийн хөтөлбөрөөс Монгол Улсад 2023-2027 онд хэрэгжүүлэх хөтөлбөр нь манай улсад тогтвортой, хүртээмжтэй хөгжлийг дэмжихэд чухал хувь нэмэр болохыг тэмдэглэв.
НҮБ-ын Хөгжлийн хөтөлбөрийн Суурин төлөөлөгч М.Димовска Монгол Улс тогтвортой хөгжлийн зорилгын хэрэгжилтийг хангах хүрээнд хүч чармайлт гарган амжилттай ажиллаж буйг сайшаан дурдаж, Монгол-НҮБ-ын хөгжлийн хамтын ажиллагааг өргөжүүлэн хөгжүүлэхийн төлөө идэвхтэй ажиллахаа илэрхийлэв.
НҮБ-ын Хөгжлийн хөтөлбөр ирэх 5 жилд манай улстай 1/ төрөлжсөн, хүртээмжтэй, ногоон эдийн засгийн шилжилт, 2/ эрсдэлийн мэдээллээр хангасан, уур амьсгалын өөрчлөлтөд дасан зохицсон, байгалийн эко-системийн тогтвортой менежмент, 3/ эмэгтэйчүүдийг чадавхжуулах, хүртээмжтэй, хариуцлагатай засаглал ба тогтвортой хөгжлийн зорилгод хүрэх ахиц дэвшил гэсэн тэргүүлэх чиглэлийн хүрээнд хамтран ажиллах юм.
