Гадаад харилцааны сайд Б.Батцэцэг 12 дугаар сарын 3-ны өдөр болсон “Онлайн эрх чөлөө” эвслийн 10 жилийн ойн бага хуралд цахимаар оролцож, мэндчилгээ дэвшүүлэв. Сайд Б.Батцэцэг Монгол Улс тус эвслийн үүсгэн байгуулагч гишүүний хувьд өнгөрсөн 10 жилийн хугацаанд дэлхий дахинд интернэтийн эрх чөлөөг хамгаалах, урагшлуулах чиглэлээрх шинэ алсын хараа, үүрэг амлалтын төлөө гишүүн улсуудтай нягт хамтран ажиллаж, идэвх санаачилгатай ажиллаж ирснийг дурдаад, КОВИД-19 цар тахлаас үүдэлтэй сорилтуудыг даван туулахын төлөөх хүч чармайлтаа нэмэгдүүлэхийн чухлыг онцлон тэмдэглэв.
Тэрээр Монгол Улс дижитал үндэстэн болох зорилтын хүрээнд Дижитал хөгжлийн яам, Цахим Монгол академийг байгуулах шийдвэрийг УИХ–аас баталсныг мэдээлэв.
Бага хурлаас нээлттэй, хүртээмжтэй интернэт болон хүний эрхэд суурилсан цахимжилтын төлөөх Хельсинкийн тунхаглалыг баталж, Канад Улсыг Эвслийн даргаар сонгосон байна.