Үнэлгээ өгөх Үнэлгээ өгөх
НүүрҮйл явдлын мэдээЭРҮҮГИЙН ШУДАРГА ЁСНЫ АСУУДЛААРХ УУЛЗАЛТАД ОРОЛЦОЖ БАЙНА

ЭРҮҮГИЙН ШУДАРГА ЁСНЫ АСУУДЛААРХ УУЛЗАЛТАД ОРОЛЦОЖ БАЙНА

НҮБ-ын Мансууруулах бодис, гэмт хэрэгтэй тэмцэх алба, НҮБ-ын Хүний эрхийн дээд комиссарын газар, Европын Аюулгүй Байдал, Хамтын Ажиллагааны Байгууллагын Ардчилсан институт, хүний эрхийн албатай хамтран “Эрүүгийн шударга ёсны асуудлаарх Төв Азийн мэргэжилтнүүдийн 8 дугаар уулзалт”-ыг 2021 оны 11 дүгээр сарын 24-25-ны өдрүүдэд Узбекистан Улсын Ташкент хотноо зохион байгуулж байна.

Энэхүү уулзалт нь эрүүгийн эрх зүйн салбарт бодлого боловсруулах, шинэчлэл хийх зорилгоор шүүхийн шинэтгэл, хүний эрх, түүний дотор эрүүгийн хэрэг хянан шийдвэрлэх ажиллагаанд шударгаар шүүх эрх, үндэсний хууль тогтоомжийг олон улсын стандартад нийцүүлэх зэрэг асуудлаар харилцан туршлага, мэдээлэл солилцох зорилготой юм.

Уулзалтын эхний өдөр монголын талын оролцогчдыг төлөөлж Гадаад харилцааны яамны Олон улсын гэрээ, эрх зүйн газрын захирал С.Сүхболд Монгол Улсын нэгдэн орсон эрүүгийн эрх зүйн чиглэлийн олон талт олон улсын гэрээний хэрэгжилт, цаашид авч хэрэгжүүлэх арга хэмжээний талаар танилцуулав. Түүнчлэн олон улсын онц ноцтой гэмт хэргүүд болох төрлөөр устгах, хүн төрөлхтний эсрэг болон дайны гэмт хэргийн асуудлаар эрх зүйн туслалцаа үзүүлэх тухай олон улсын конвенц байгуулах санаачилгыг Монгол Улс дэмжин ажиллаж байгааг тэрээр онцлов.

Уулзалтын 2 дахь өдөр Шударга шүүхийн талаарх салбар хэлэлцүүлэгт Улсын дээд шүүхийн шүүгч Б.Батцэрэн Монгол Улс дахь эрүүгийн эрх зүйн болон шүүхийн шинэтгэлийн талаар илтгэл хэлэлцүүлнэ.

Төлөөлөгчдийн бүрэлдэхүүнд Улсын ерөнхий прокурорын газар, Дотоод хэргийн их сургуулийн төлөөлөгчид ажиллаж байна.