Монгол Улсаас Тайландын Вант Улсад суугаа Элчин сайд Т.Төгсбилгүүн Тайландын Худалдааны танхим болон Худалдааны зөвлөлийн ахлах зөвлөх Элчин сайд Крисада Пиампонсант тэргүүтэй ахлах албан тушаалтнуудтай 2017 оны 3 дугаар сарын 7-ны өдөр уулзав.
Уулзалтын үеэр талууд Монгол, Тайландын худалдаа, эдийн засгийн хамтын ажиллагааг өргөжүүлэн хөгжүүлэхэд хувийн хэвшлийнхний үүрэг чухал болохыг санал нэгтэйгээр тэмдэглээд хоёр орны худалдааны танхимууд хооронд төлөөлөгч солилцох, Монгол-Тайландын бизнес форум зохион байгуулах, хоёр орны ижил төстэй худалдаа, бизнесийн байгууллага хооронд хамтын ажиллагааны санамж бичиг байгуулах гэх зэрэг тодорхой асуудлаар санал солилцов.
