Монгол Улсын Зам, тээврийн хөгжлийн сайд Д.Ганбат тэргүүтэй төлөөлөгчид ОХУ-ын “Оросын төмөр замууд” НХН-ийн ерөнхийлөгч О.В.Белозёровтой Москва хотноо 12 дугаар сарын 8-ны өдөр албан уулзалт хийв. Уулзалтанд Элчин сайд Б.Дэлгэрмаа болон Элчин сайдын яамны ажилтнууд оролцов.
Уулзалтын үеэр Монгол, Оросын хамтарсан “Улаанбаатар төмөр зам” нийгэмлэгийн эрх зүйн орчныг сайжруулах, хүчин чадлыг нэмэгдүүлэх, тээвэрлэлтийн нөхцлийг боловсронгуй болгох, Монгол Улсын нутаг дэвсгэрээр дамжин ОХУ-аас БНХАУ руу тээвэрлэх ачааны хэмжээг нэмэгдүүлэх, “Монгол, Орос, Хятадын хооронд эдийн засгийн коридор байгуулах хөтөлбөр”-т тусгагдсан төмөр замын дэд бүтцийн тээврийн төслүүдийг хэрэгжүүлэх чиглэлээр хамтран ажиллах боломжийн талаар санал солилцож, цаашид хоёр талын хамтын ажиллагааг идэвхжүүлэхээр тохиролцов.
Уулзалтын төгсгөлд “Улаанбаатар төмөр зам” ХНН-ийн хувь нийлүүлэгчдийн хуралдааны протоколд гарын үсэг зурав.
