Монгол Улсаас ХБНГУ-д суугаа ЭСЯ тус улсад сурч, ажиллаж, амьдарч буй монгол иргэд, Берлин хотод үйл ажиллагаа явуулж буй монголчуудын холбоо, ТББ-уудтай хамтран 2016 оны 10 дугаар сарын 29-30-ны өдрүүдэд Берлин хотноо “Европ дахь монголчуудын сагсан бөмбөгийн аварга шалгаруулах 11 дэх удаагийн тэмцээн”-ийг амжилттай зохион байгууллаа.
Энэхүү тэмцээнд ХБНГУ, ИБУИНВУ, ОХУ, БНФУ, БНПУ, БНАУ, БНЧУ, БНУУ, БНИУ, Бельгийн Вант Улс, Нидерландын Вант Улс, Шведийн Вант Улс, Швейцарын Холбооны Улс, Украйн Улс зэрэг Европын 14 оронд сурч, ажиллаж, амьдарч байгаа монголчуудын 37 баг, 400 орчим тамирчид оролцон хурд хүч, авхаалж самбаагаа сорин өрсөлдлөө. Эрэгтэй багаас ОХУ-д сурч, ажиллаж, амьдарч байгаа монголчуудын “Мөнхтэнгэр баг” алтан медаль, ХБНГУ дахь монголчуудын “Буяны сэтгэлт хүү” баг мөнгөн медаль тус тус хүртсэн бол эмэгтэй багаас ХБНГУ дахь монголчуудын “Скай баг” алтан медаль, ОХУ дахь монголчуудын “Мөнхтэнгэр баг” мөнгөн медаль тус тус хүртлээ.
Энэ удаагийн тэмцээнийг ХБНГУ-ын Берлин хотын Спорт Сенатаас хоёр орны соёл, спортын салбарын харилцааг хөгжүүлэх хүрээнд дэмжин “MAX-SCHMELLNG” спорт цогцолборт зохион байгуулах боломжоор хангаж тэмцээн анх удаа стандартын шаардлага хангасан зургаан талбайд зэрэг явагдсанаараа онцлог байв.
Европын орнуудад сурч, ажиллаж, амьдарч байгаа монголчуудын дунд жил бүр зохион байгуулагддаг уг тэмцээн өргөн хүрээнд болж баг тамирчид, хөгжөөн дэмжигчид, зохион байгуулагчид зэрэг нийт 1000 гаруй монголчууд Берлин хотноо хуран цуглаж спортоор нөхөрлөсөн үр дүнтэй арга хэмжээ боллоо.