ОХУ-ын БХЯ-ны Олон улсын гадаад хамтын ажиллагааны ерөнхий газраас 10 сарын 22-28-ны өдрүүдэд зохион байгуулсан ОХУ-ын “Дорнод”-ын цэргийн тойргийн зарим анги нэгтгэлүүдийн үйл ажиллагаатай ОХУ-д суугаа гадаадын улс орнуудын цэргийн атташегийн аппаратыг танилцуулах арга хэмжээнд Монгол Улсаас ОХУ-д суугаа ЭСЯ-ны Цэргийн атташе, бригадын генерал Г.Энхбаатар, Цэргийн атташегийн туслах, хошууч Г.Одбаяр нар оролцов. Нийт гадаадын 33 орны цэргийн атташегийн аппаратын 41 төлөөлөгч тус арга хэмжээнд хамрагдав.
Тус арга хэмжээний хүрээнд Южно-Сахалинск хотод байрлах 39 дүгээр мотобуудлагын бригад, Комсомольск-на-Амуре хотод байрлах 23 дугаар сөнөөгч онгоцны нисэхийн хороо, Благовещенск хотод байрлах ЗХУ-ын Маршал К.К.Рокоссовскийн нэрэмжит Алс Дорнодын ерөнхий цэргийн командын дээд сургууль, Улаан-Үд хотод байрлах Агаар-десантын хүчний 11 дүгээр гвардийн десант-дайралтын бригадын үйл ажиллагаа болон ОХУ-ын Зэвсэгт хүчинд хэрэглэгдэж байгаа зарим зэвсэглэл, техник тоног төхөөрөмжтэй танилцав.
Благовещенск хотод байрлах ЗХУ-ын Маршал К.К.Рокоссовскийн нэрэмжит Алс Дорнодын ерөнхий цэргийн командын дээд сургуулийн үйл ажиллагаатай танилцах явцад тус дээд сургуульд суралцаж буй Монгол Улсын Зэвсэгт хүчний дөрвөн сонсогчтой уулзалт зохион байгуулж, тэдний сурлага, аж амьдралын талаар ярилцаж, санал хүсэлтийг нь сонсов.
