Братислав хотын захиргаанаас жил бүрийн 7-9 дүгээр сарын хооронд зохион байгуулдаг Соёлын арга хэмжээний хаалтын үйл ажиллагаа 9 дүгээр 10-ны өдөр Братислав хотноо болж өнгөрлөө.

Соёлын арга хэмжээнд хоёр сарын турш оролцсон бүхий л иргэд, байгууллага хамтран хаалтын үйл ажиллагаанд оролцов. Арга хэмжээнд хүрэлцэн ирсэн зочид төлөөлөгчдөд зориулан монгол гэр барин үндэсний дуу бүжиг, хоол, эд зүйлсээр үйлчилж, өөрийн улсаа сурталчилан таниулах үйл ажиллагааг тус ЭСЯ болон Словак улсад суугаа Монгол иргэдийн үүсгэл санаачлагаар байгуулагдсан “Монгол-Словакын Анд нөхдийн нийгэмлэг” ТББ хамтран зохион байгуулав.

Арга хэмжээний үеэр орон нутгийн телевиз болон хэвлэлд ярилцлага, мэдээлэл өгсөн бөгөөд “Монгол-Словакын Анд нөхдийн нийгэмлэг” ТББ нь 2016 оны 10 дугаар сард Кошице хотод болох олон улс, үндэстний шөлтэй хоолны фестивальд Монгол үндэсний хоолоор оролцохоор төлөвлөж байна.