Монгол Улсын Ерөнхийлөгчийн зарлигаар БНПУ-ын Сеймийн дэд маршал асан, Польшийн зүүний ардчилсан намын дэд тэргүүн Ежи Вендерлихийг “Алтан гадас” одонгоор шагнав. Түүнийг Польш, Монголын парламент хоорондын харилцааг өргөжүүлэх, Польшийн Парламентын хууль тогтоох гол танхим болох Сеймтэй харилцаа тогтооход идэвхи зүтгэл гаргаж, хоёр орны хоорондын хамтын ажиллагааны хөгжилд үнэтэй хувь нэмэр оруулсан хэмээн үзжээ.
Мөн БНПУ-ын Сенатын Тамгын Газрын Гадаад болон Европын холбооны хэргийн хэлтсийн дэд захирал, монгол судлаач Роберт Бобровскийг “Найрамдал” медалиар шагнав. Тэрээр Польш, Монголын парламент хоорондын харилцааг өргөжүүлэхэд идэвхи зүтгэлтэй ажиллаж, хоёр орны хоорондын хамтын ажиллагааны хөгжилд хувь нэмэр оруулжээ.
Шагналыг Монгол Улсаас БНПУ-д суугаа Онц бөгөөд Бүрэн эрхт Элчин сайд Н.Батаа 2016 оны 3 дугаар сарын 1-нд гардуулан өгөв.
Варшав дахь ЭСЯ-ны байранд болсон дээрх ёслол арга хэмжээнд БНПУ-аас Монгол Улсад суугаа онц бөгөөд Бүрэн эрхт элчин сайд Михал Лабенда болон Польшийн Парламент, ГХЯ-ны төлөөлөгчид оролцжээ.
