Монгол Улсын Ерөнхийлөгч Ц.Элбэгдорж БРИКС, Евразийн эдийн засгийн холбоо, ШХАБ-ын гишүүн болон ажиглагч орнуудын төр, засгийн тэргүүн нарын хамтарсан уулзалтад оролцож, үг хэлэв. Эдийн засгийн хөгжлөөрөө дэлхийд тэргүүлдэг 5 орны төрийн тэргүүн нарын оролцсон тус уулзалт нь анх удаа ШХАБ-ын гишүүн орнуудын төрийн тэргүүн нарын зөвлөлийн хуралдаантай зэрэг зохион байгуулагдаж буйгаараа онцлог юм. Бүс нутаг төдийгүй олон улсын аюулгүй байдал, тогтвортой хөгжилд чухал хувь нэмэр оруулахуйц улс орнуудын төрийн тэргүүн нар хамтран чуулж байгаа нь дэлхийн эдийн засгийн өсөлтөд чухал түлхэц үзүүлнэ гэж Монгол Улс үзэж байгааг Ерөнхийлөгч Ц.Элбэгдорж хэлсэн үгэндээ дурдав. Монгол Улс Евразийн бүс нутгийн хөгжлийн интеграцид идэвхтэй оролцогч улсын хувьд тус уулзалтад оролцсон болно.