Малайз Улсын нийслэл Куала Лумпур хотноо 8 дугаар сарын 5-6ны өдрүүдэд болж байгаа АСЕАН-ы бүсийн чуулга (АРФ)-ын Сайд нарын 22 дугаар уулзалтад Монгол Улсын Гадаад хэргийн сайд Л.Пүрэвсүрэн тэргүүтэй төлөөлөгчид оролцлоо.

Бүс нутгийн аюулгүй байдал, тогтвортой байдлыг хангахад чухал үүрэг гүйцэтгэж буй Ази, Европ, Америкийн 27 орныг хамруулсан энэхүү чуулга уулзалтад оролцохын сацуу АСЕАН-ы гишүүн 10 улс болон бусад түнш орны төлөөлөгчдийн тэргүүн нартай уулзаж, хоёр талын харилцаа, хамтын ажиллагааны талаар санал солилцож байна. Гадаад хэргийн сайд Л.Пүрэвсүрэн Канад Улсын Гадаад хэргийн дэд сайд Даниэль Жан, Шинэ Зеланд Улсын Гадаад хэргийн сайд Маррей Маккалли, ОХУ-ын Гадаад хэргийн сайд Сергей Лавров, АНУ-ын Төрийн нарийн бичгийн дарга Жон Керри, БНАСАУ-ын Гадаад хэргийн сайд Ри Сү Ен, Малайз Улсын Гадаад хэргийн сайд Анифах Аман, БНХАУ-ын Гадаад хэргийн сайд Ван И нартай хоёр талын уулзалт хийж, цаашдын хамтын ажиллагаа, бүс нутаг болон олон улсын асуудлаар санал солилцов.

Мөн тус уулзалтын үеэр сайд Л.Пүрэвсүрэн АСЕАН-ы Ерөнхий нарийн бичгийн дарга Ле Луонг Минь-тэй уулзаж, тус байгууллага болон АСЕАН-ы орнуудтай цаашид хамтран ажиллах чиглэлийн талаар дэлгэрэнгүй санал солилцов.